2Cor 1 | SWP | STEP | Paulo, Iesu Keriso ena aposotolo Eaubada ena nuatu eai, eo eda tau Timoteo, Eaubada ena ekalesia Korinito eai enadi ai uri, maedi hetabu tataodi gamagaridi, Akaia tupo gamagarina eai se miamia:

2 Corinthians 1

Paulo ena paipaisoa matapaana bena i hemasaraha.

1 Paulo, Iesu Keriso ena aposotolo Eaubada ena nuatu eai, eo eda tau Timoteo, Eaubada ena ekalesia Korinito eai enadi ai uri, maedi hetabu tataodi gamagaridi, Akaia tupo gamagarina eai se miamia:

2 Ainauia bena enamiu, eo loni Eaubada Tamada arinai i laoma, eo Guiau Iesu arinai.

3 Eaubada ta hedebasaei, iaede eda Guiau Iesu Keriso Tamana, nuatoatoa Tamana, eo henuabiga gamagari Eaubadana, 4 ia i henuabigada eda amamna gamagamagari boeadi eai, abo ita hinage abina ta ata tatao edi amamna eai ta henuabigaidi, wau nuabiga eai wa arinai Eaubada i henuabigaidao. 5 Doha Keriso ena amamna ai ai hearo aririei, ena henuabiga abo ai hearo hinage, ai abihelai, Keriso debana eai. 6 Ena se heamamnamai, meta omi emi henuabiga eo emi mauri debana eai; e ena se henuabigaimai meta omi emi henuabiga debana eai, ena taba amamna au hearodi, doha ai ai hearodi. 7 Ema sunumaemiu i ota esegai, paana ai nuatuiyao amamna au hearodi, henuabigana abo au hearo hinage.

8 Heamamna lailai Asia eai ai hearo, nige ai henua au supusupuei; se hebaaea‐aririemai ema adidiri nige gonoana, hinage nuamai se beruberu ariri ai ene ibai abo ai mauri e nige’e? 9 Ema mate ribana se ribaeyao, taiede bena tabu ai sunumauioimai na Eaubada mo mate eai tauhetohetorouio. 10 Mate matausina i lai ariri, arinai i iairihaimaio, eo abo i iairihaimai, eo ai sunusunumaei maraitom‐asubena hinage abo i iairihaiuioimai. 11 Omi hinage, bena emi uura eai au sagusaguimai, bena tatao gamagaridi ai debamai eai abo se lautoi, paana ainauia ai arimai eai wa, isi abo se hearo, uura gamagaridi maisadi.

12 Paana ema aba‐kode ede ina, nuaboeamai eai ema nuatu duduraina wa i hemasarahamai, ema iila tabuna eo ama ao mamohoi Eaubada matana eai, nige buluma ena sonoga eai na Eaubada ena ainauia debana eai ema miamia tanoubu eai ta aie abi, eo omi hinage arimiu eai. 13 Nige riba udoi enamiu ai uri, riba esegana mo, iaede au hasiriyao eo au italobaiyao, ea sunumaemiu abo au italobai i lau e anasiga, 14 doha tupona au italobaiyao, bena ai abo emi abakode, eo omi ai ema abakode, Guiau Iesu asubenana eai.

15 Teina egu nuatu adidiri ta debana eai bena ea laowa, bena egu aba‐helolomiu helabuina; 16 bena ea itamiu abo ea taudaru ea lau Makedonia, e abo Makedonia eai ea uiowa arimiu eai, bena egu adau eai au healatugu Iudea edana eai. 17 Ina egu nuatu eai ta arinai au ene egu dobila ea buibuidi, wa? Doha bulumagu i woeawoeaigu, doha gonoagu ea ene E, E, e Nige’e, Nige’e? 18 Agutoi, doha Eaubada ia mamohoina, ema riba arimiu eai nige E, to Nige’e. 19 Eaubada Natuna Iesu Keriso ai ribahemasaraha arimiu eai wa, eau maegu Silevano eo Timoteo, ia ena riba nige E eo Nige’e, na huia gamagari E mo. 20 Eaubada ena ribahesunuma gamagaridi isi ede Hedeona. Arinai ia debana eai ita ta ene Amen, Eaubada ta hedebasaei. 21 Eaubada ia tauhetorotahitahida, omi eo ai, Keriso boeana eai, eo i tauribaeda; 22 eo i goraidao Earua heiheinoina nuada eai i leamao.

23 Eaubada ea eogai ia tauhemasarahagu ede, sora nige ea lagewa Korinito, paana emi huia ea leawa baguna. 24 Nige bena emi sunuma ai tanuagaei, emi kode mo bena ai sagui, eo emi sunuma boeana eai au torotahitahimiu.